வாசல்

பிரித்தறிய இயலாத   
உன்  மௌனம்  புன்னகை
அர்த்தம்  தேடித் தேடி
தொலைத்துவிடுகிறேன்
வார்த்தைகளை
எனை சோதனைக்குள்ளாக்கி 

வாழ வா  இல்லை நான் வாழவா ?!



நிழல் தேடி ஒதுங்கினேன்
வெட்டப்பட்ட மரத்தினடியில்
உன் மனம் தேடி
ஒதுங்கியது என் காதல்


* * *

விடியல் நீயென
நானிருக்க
அஸ்தமனம் இல்லா
என் உலகில் விடியல் ஏதடி
என்கிறாய்

* * *

image -google

                                                    'ம்' என்று நீ சொல்லும்                                               
                                                    ஒவ்வொரு முறையும்
                                                    ஓராயிரம் வார்த்தை சொன்னதாய்
                                                    திருப்திபட்டுக் கொள்ளச் சொல்கிறது
                                                    'ம்' உடன் தொடர்ந்து வந்த
                                                    உன் புன்னகை...!

                                                    * * *

                                                    சொல்ல வந்ததை மறைத்து
                                                    வேறு எதையோ
                                                    பேசி விடைபெறும்போது
                                                    விழுந்து நொறுங்குகிறது  
                                                    மனதைவிட்டு வெளியேறிவிட்ட
                                                    ஒலியற்ற சொற்கள் !

                                                    * * *

                                                    என்னவன்
                                                    தூங்கவேண்டும்
                                                    தொல்லைப் பண்ணாமல்
                                                    தொலைந்து போங்கள்
                                                    துரத்தி விட்டேன்
                                                    உன் மீதான என் நினைவுகளை...

                                                    * * *

                                                    வழக்கம்போல காசோலையில்
                                                    இன்று கையெழுத்திட்டேன்
                                                    ஏதோ வித்தியாசம் 
                                                    உற்றுக் கவனித்தேன்
                                                    எப்போது இணைந்தது
                                                    என் பெயருடன் உனது பெயர் !

                                                    * * *


                                                   அடுத்தவர் கவிதை வாசிக்கும் போது
                                                   உன் நினைவு வரும்
                                                   உன் கவிதை வாசிக்கும் போது
                                                   என் நினைவு போகும்
                                                   கவிதை யாருக்கானது என...!

                                                    * * *

                                                    எனக்கு உன் மௌனம் பிடிப்பதில்லை  
                                                    உனக்கு என் சத்தம் பிடிக்காது
                                                    இருவரும் இணையும் பொழுதில்
                                                    இரண்டு மௌனங்கள்                                                                                                                        பேசிக்கொண்டிருக்கின்றன
                                                    சத்தமாக !

                                                    * * *                                                    

image -Google

அன்னையிடம் இருந்து
தொடங்கியது என் உலகம்
சுழலத் தொடங்கியது
உன்னை சந்தித்தப்பிறகு !

வண்ணத்துப்பூச்சி எனக்கு தெரியும்
வண்ணங்கள் இருக்கிறது பார் என்றாய்
கம்பன் பாரதி உன் உறவென
அறிமுகப்படுத்தினாய்

அடைந்துக்கிடக்காதே
சிறகடித்துப் பற...

வானம் உன் வசமாகும்
என்றாய்

சிறகில்லை என்றேன் 
சிரித்துக் கொண்டே
அணிவித்து விட்டாய்
அதுவரை நான் அறியாச் சிறகை
என்னுள் இருந்து எடுத்து !?

படித்ததெல்லாம் மறந்தது என்றேன்
புதிதாய் படி கற்றுத் தருகிறேன் என்றாய்
உன்னையும் படிக்க வைத்தாய்
விரும்பிப் படித்தேன் !

பூட்டிய சிறகுடன் பறக்க
எத்தனித்தப் போது
எங்கோ கிளம்பிவிட்டாய் நீ...
காரணம் கேட்டேன்
'உன் நினைவுகள் 

என் நினைவுகள் அல்ல' 

காற்றின் வழி செவியை அறைகிறது

எனக்கான பதில் !!? 

* * * * *

image - Google

                                                           ஓட ஓடி  ஒளிகிறாய்
                                                           என்னை என்னுள் ஒளிக்கிறாய் 
                                                           தேடத் தேட தொலைகிறாய்
                                                           என்னையும்  தொலைக்கிறாய் 
                                                           எங்கேயென  கெஞ்சினால்  
                                                           வானத்தில்  உனது குரல் 
                                                           அண்ணாந்து பார்க்கையில்
                                                           மேகத்தினுள்  மறைகிறாய்
                                                            பகலில்
                                                            கதிரவனை போலாகிறாய்
                                                            இரவினில் 
                                                            நிலவே நான்தான் என்பாயோ...!

                                                            கண்ட கனவொன்று
                                                            கலைந்தப் போது
                                                            எனதருகில் சிறகொன்றை
                                                            கண்டெடுத்தேன் நேற்றிரவு...!

                                                            இதோ என்  நேச இரைகளை
                                                            வானெங்கும் தூவுகிறேன்
                                                            பறவையென பறந்து திரியும் நீ
                                                            கொத்தித் தின்றுவிடு
                                                            இன்றேனும் ...!

                                  மௌனமான மௌனங்கள் !
                                  திரை விலகும் தருணம் 
                                  எதிர்பார்த்தே 
                                  விழும் மற்றொரு கனத்த திரை !
                                  எதற்கான ஊடல், 
                                  மறந்து புதிதாய் சேர்ந்த
                                  உனது பாரா முகம் !


                                  உனக்கான சொற்கள், தகவல்கள்
                                  எனக்குள்
                                  பிடிவாதமாய் மரிக்கின்றன !
                                  தனிமை உதடுகள் அசைய
                                  வார்த்தைகள் காற்றில்
                                  கேட்பாரற்று!


                                  பிரிவு வலிக்கிறது
                                  
                                   பூமி நனைத்த மழை
                                   ஒரு போதும்
                                   வான் நனைத்ததில்லை !
                                   நீ வான்
                                   வெப்பம், குளுமை உன்னில் !
                                   நான் மண் 
                                   தாங்குவேன் என்னில் !


                                   தவிப்பதும்
                                   தடுமாறுவதும்
                                   காத்திருப்பதும்
                                   கலங்குவதும்
                                   காதலுக்கு புதிதா ?!


                                   காலமற்று போய்
                                   திசைகளற்ற பயணத்தில்
                                   செயலற்று பறக்கும்
                                   சிறகுகளற்ற 
                                   ஒரு சிறு பறவை !!














படங்கள் - நன்றி கூகுள்