பிடிக்கும்...!


                                                         கடும் வெயில்...  
                                                         என் மீது மழை பொழிந்தது !
                                                         இலையுதிர்காலம்... 
                                                         என் தோட்ட 
                                                         கொன்றை மரம் பூத்தது !
                                                         அப்போது 
                                                         என் வாழ்வில் நீ வந்தாய் !!

                                                         பேருந்து 
                                                         ஜன்னலோர தனி பயணம் 
                                                         மிக பிடித்ததாயிற்று 
                                                         எல்லா பயணமும் 
                                                         உன்னை நெருங்க எடுக்கும் 
                                                         பிரயத்தனம் என்பதால்!
  
                                                         பயண வழியெங்கும் 
                                                         உன் முகம் தோன்ற
                                                         ரசித்து ரசித்து வலிக்கும் 
                                                         மனகண்ணுக்கு களிம்பு பூசட்டும்
                                                         சிறு புன்னகை சிந்தேன் !

                                                         நீ அழைக்கும் போதெல்லாம்
                                                         செல்பேசியுடன் மொட்டை மாடி 
                                                         விரைந்து ஓடுவேன் 
                                                         குரலுடன் 
                                                         உன்னை சுவாசிக்க ! 
                                                       
                                                         இரவில்  நீ
                                                         பேசும் பேச்சுக்கள் தானே 
                                                         மறுநாள் பகலில் 
                                                         என்னை உயிர்ப்புடன் 
                                                         வைத்திருக்கிறது !
                                                         
                                                         எரிமலை வெடித்து 
                                                         நதி பெருக்கெடுக்கும் ! 
                                                         பாலையில் 
                                                         நீரூற்று  புறப்படும் !
                                                         எதுவும் மாறும்  
                                                         என்னை தவிர... 
                                                         ஒருநாள் உனக்கு 
                                                         என்னை பிடிக்காமல் போகும் 
                                                         அப்போதும் 
                                                         உன்னை  காதலிப்பேன் !
                                                          ... 
                                                          ...
                                                          ...
                                                          உன்னை எனக்கு மிக பிடிக்கும் !!






படங்கள் -கூகுள் 


இனி...!

   

                                     
                                            சந்தேகம் கொள்வாய் 
                                            தெரிந்திருந்தால்
                                            நெருப்பில் வேகவைத்து 
                                            பரிமாறியிருப்பேன் மனதை !

                                            நம்பிக்கையற்று போவாய்
                                            தெரிந்திருந்தால்
                                            தீயில் குளிக்க வைத்து 
                                            உடுத்தி இருப்பேன் காதலை !

                                            உன் பாதை எங்கும் 
                                            பூத்தூவி பார்த்துக்கொண்ட நான்
                                            உன் மனதை கறை படியாமல்
                                            கவனிக்க தவறிவிட்டேன் !

                                            நீ தூங்கும் அழகை 
                                            மனக்கண்ணால் கண்டு 
                                            இமைகளால் தாலாட்டுவேன் 
                                            ஒரே சொல்லில் என் 
                                            விழிகளை பிடுங்கி எறிந்துவிட்டாய் !

                                            விரும்பி உன்னில் தோற்று போனேன்
                                            விருப்பமின்றி விலகி போகிறேன்
                                            ஒருவருக்காக ஒருவர் மறந்துவிடுவோம்
                                            நம் காதல் தானாகவே இறந்துவிட கூடும் !

                                            செல்லரிக்காத காதல் என்றாய்
                                            சொல்லடித்து செத்துப்போன காதலை 
                                            என்றாவது ஒருநாள்
                                            மயானத்தில் தேடுவோம் !

                                            கண்டுபிடித்தால் மீண்டும் 
                                            குழிதோண்டி புதைத்துவிடுவோம் 
                                            வேண்டாம் எரித்துவிடுவோம்
                                            தற்கொலை செய்த காதல் 
                                            ஆவியாய் அலைய கூடும் !! 



இன்று...!

                                                     
                                                        நேற்று


                                                         நீ பேசுகிறாய்
                                                                   ரசிக்கிறேன்
                                                         நீ சிரிக்கிறாய்
                                                                   மிதக்கிறேன்
                                                         நீ அழைக்கிறாய்
                                                                   கிறங்குகிறேன்
                                                         நீ சிணுங்குகிறாய்
                                                                   உளறுகிறேன்
                                                         நீ ரசிக்கிறாய்
                                                                   சிலிர்க்கிறேன்

                                                         இன்று


                                                         நீ யோசிக்கிறாய்
                                                                    யாசிக்கிறேன்     
                                                         நீ மறுக்கிறாய்
                                                                    துடிக்கிறேன்
                                                         நீ மௌனிக்கிறாய்
                                                                    தவிக்கிறேன்
                                                        
                                                         நீ எழுதுகிறாய் யாருக்கோ 
                                                              படிக்கிறேன் விழி நீரை மறைத்தபடி
                                                              
                                                         
                                                         உன்னால் கொல்லப்பட்டும்
                                                         உன் நினைவுகளினால்
                                                         வாழ்ந்து கொண்டிருக்கிறேன் !!







படம்  : நன்றி கூகுள் 





ஏனோ...!

                                             


                                               பிறந்த மண், பாயும் நதி,
                                               காயும் நிலவு, சுழன்றடிக்கும் புயல்
                                               எதிலும் பெண் வடிவம் கண்டு மகிழ்ந்தவன்
                                               பின் தன்தன் மனை மதியாமல் போனானே !

                                               கல்வி கற்ற கலைமகளை விட 
                                               கை நிறைய பொருள் கொணரும்
                                               திருமகள் தேவை என தேடியவன்
                                               அதிலும் திருப்தி அடையாமல் போனானே !

                                               தேவதை போலொரு மனைவி  
                                               அடைந்தால் சுவர்க்கம் வேறில்லை
                                               தலையில் வைத்து கூத்தாடியவன்
                                               பின் சந்தேகக்கண் கொண்டு எரித்தானே !

                                               அன்புக் கடங்குவதிலும், 
                                               துன்பத்தில் இன்பம் கண்டவள் 
                                               இவள் போல் யார் என்றவன்
                                               அதிலும் பெண்மை உணராமல் போனானே !

                                                இதுவே பெண்மையின் விதி 
                                                தலை கவிழ்ந்தது முடியுங்காலம் 
                                                வந்ததம்மா - 'வென்றிடும் பெண்மை' 
                                                எங்கோ தூரத்தில் ஒரு குரல்.....


                                                ஏனோ எனக்கு மட்டும் கேட்கிறது !!






படம்- கூகுள் 

யாரோ...!

                                                 
                                                   
                                                   யாரோ 
                                                               அழைக்கிறார்கள் 
                                                                உன்னை உரிமையாக !

                                                   யாரோ 
                                                                உறவாடுகிறார்கள் 
                                                                உன்னுடன் அன்பாக !

                                                    யாரோ 
                                                                 விசும்புகிறார்கள் 
                                                                 நீ பேசவில்லை என !

                                                    யாரோ 
                                                                 மௌனிக்கிறார்கள் 
                                                                 நீ கடிந்துக் கொண்டதால் !

                                                    யாரோ 
                                                                 எனதென்கிறார்கள் 
                                                                 உன் உடமைகளை !

                                                    யாரோ 
                                                                 சண்டையிடுகிறார்கள் 
                                                                 உனக்கு பரிந்து கொண்டு !

                                                    சகித்துக்கொண்டு 
                                                    உன் தோள் சாய்ந்தேன் 
                                                    மௌனமாக !
                                                    
                                                    இன்று என்னை யார் 
                                                    என்கிறார்கள் !? 
                                                    அறிவார்களா 
                                                    
                                                     உன் உயிரின் ஓரம் நான் என்பதை !!                                                     


    






படம் - கூகுள்





அப்படியா...!

                                       
                                          ஆசையாய் நெஞ்சணைத்து 
                                          சேர்த்தள்ளி கொண்டு வந்தேன் !


                                          புது மணம் முகர்ந்து
                                          முகத்தோடு ஒற்றி மகிழ்ந்தேன் !


                                          பளபள மேனி அழகு வியந்து  
                                          பிடித்த இடத்தில் அமர வைத்தேன் !  


                                          மெல்ல என் விரலால் 
                                          தொட்டு வருடி ரசித்தேன் !


                                          புரட்டி பார்க்க   
                                          ஆவலாய் காத்திருந்தேன் !
                                                           
                                          இன்றோ 
                
                                          திட்டித் தீர்க்கின்றன..... 
                                          இன்னும் 
                                          திறக்கப் படாத புத்தகங்கள் !?


                                          உன்னை படித்து கொண்டிருக்கிறேன் நான் !

                           
                                                                           


























படங்கள் - கூகுள் 



மனிதா...!

                                                        

                                                        இது சரியில்லை 
                                                        அது சரியில்லை 
                                                        இவன் எதுக்கும் லாயக்கில்லை
                                                        அவன் ஒரு உதவாக்கரை 
                                                        இரவு பகல் 
                                                        ஓய்வின்றி  
                                                        சலிப்பின்றி சொன்னேன்
                                                        அலுக்கவில்லை எனக்கு !  
                                                         ..............
                                                         நான் 
                                                         கொஞ்சம் மாறியிருக்கலாம்
                                                         தவறில்லை 
                                                         தாமதமாக புரிகிறது
                                                         மரணபடுக்கையில் !!
  

                                                                     **************


                                                          லட்சத்தில் ஒரு துளி
                                                          போகட்டும் 
                                                          விட்டுவிட மனமின்றி
                                                          எழும்முன் விரைந்து 
                                                          அடித்து கொன்று   
                                                          சிரிக்கிறது மிருகம் !
                                                          செத்துக்கிடக்கிறது 
                                                          கடித்த கொசு !!